অসমীয়া বিষন্নতাৰ কবিতা

অসমীয়া বিষন্নতাৰ কবিতা

কবিতা :: নালাগে --- জাহাঙ্গীৰ আলম

নালাগে তোমাৰ মৰম
নালাগে তোমাৰ প্ৰেৰণা
তুমি বিহীন এই জীৱন
অকলশৰেই মই পাৰ কৰিম ৷

নালাগে তোমাৰ মিচিকিয়া হাঁহি
নালাগে তোমাৰ উষ্ম বুকুৰ পৰশ
নালাগে তোমাৰ সঁহাৰি
জীৱনৰ যাত্ৰাটো মই অকলেই পাৰ কৰিম ৷

নালাগে তোমাৰ মিছা প্ৰতিশ্ৰুতি
নালাগে তোমাৰ উকা বুকুৰ আলিংগন
নিজেই নিজকে সাৱটি ধৰি
নীৰৱে জীৱনটো পাৰ কৰিম ৷

তোমাৰ ছলনাত বিতৃষ্ণা হৈ
অকলশৰেই জীয়াই থকাৰ
এক কঠোৰ সিদ্ধান্ত ললোঁ
কাৰণ তুমিযে ছলনাময়ী ৷

কবিতা :: স্মৃতিৰ ৰোমন্থন --- সোণমণি গোহাঁই

স্তব্ধ সময়,স্তব্ধ ঠাই ,
বেদনাবোৰ কিন্তু বৈ গৈ আছে,
নৈৰ পানীৰ দৰে
কেতিয়াবা,
বতাহৰ দৰে ।

মৰমবোৰ আঘাত হৈ ভিতৰি ভিতৰি
কোঙা কৰি পেলাইছে
জীয়াই থাকিব বিচৰা মনটোক ;

আৰু হৃদয়খন !
সমাধিস্থ সিদিনাৰ চকুৰ বানত ।

কবিতা :: নিসংগতা --- মহিদুল ইছলাম বুলবুল

বলিয়া নকৰিবি ফাগুণ

এনেই বুকুত জুই।

আকাশৰ পৰা পৃথিৱী বিচাৰি

পছোৱাই নাথাকে শুই।

তোমাৰ দুচকুত মোৰ ছবি

মোৰ দুচকুত তোমাৰ।

বুকুৱেদি শালিব বিৰহৰ শলখা

কৰেনো অচিনা কমাৰ।

হেঁপাহৰ বাগিচাত

সপোনবোৰ ফুলে

প্ৰেমৰ পখিটি আজি

সপোন হৈ উমলে।

সেইবাবেই কৈছো

নাহিবি ফাগুন

বুকুৰ জুইয়ে আজিও দহে।

কবিতা :: স্মৃতি --- সোনমনি ৰাজ বৰুৱা

আপোনজনৰ পৰা আঁতৰি থাকি

কোনে কয় সুখী হ’ব পাৰি

প্ৰতিটো দিনেই যেন নাযায় নোপোৱায় ৷

দুচকুত … ??

অহৰনিশে ভাঁহি ফুৰে

অতীতৰ জালিকটা

স্মৃতিবোৰে ৷

দুহাত মেলিলেই শূণ্যতাবোৰ উলমি

পৰেহি মোৰ আঙলিৰ ফাঁকত

হৃদয়ৰ চাৰিকৰিয়াই

উচুপি থাকে … ???

তেওঁৰ স’তে কটোৱা সেই

ৰঙীন আবেলিবোৰ বিচাৰি ৷

কবিতা :: মৰমৰ পাহিবোৰ যে মৰহি গ'ল --- সোণমণি গোহাঁই

তেওঁৰ স'তে মোৰ দূৰত্ব...

বহুত নাছিল, একেটা কোঠাৰ দুটা চুক ।

তথাপিও...

অতিক্ৰম কৰাৰ সাহস যে কাৰো নহ'ল।

মানুহ কেনেকৈ ইমান নিৰ্বিকাৰ হ'ব পাৰে ???

মই...

আগত মই আছিলোঁ

ইপাহ সিপাহ ফুলত উৰি ফুৰা

এজনী চঞ্চল পখিলা,

আৰু এতিয়া ?

কাৰাবন্দী নিৰৱতাৰ আৱৰ্তত,

তেওঁ যে নিৰৱ!

আচলতে তেওঁ নিৰৱ নাছিল,

আছিল নিবোকা ।

তেওঁ নিবোকা হোৱাৰ বাবেই

মৰহি গৈছিল মোৰ-তেওঁৰ আৰু

আমাৰ ঘৰদুখনৰ জীৱন ।

অতীতৰ সপোনত তেওঁ তেতিয়াও মগ্ন আছিল

অথচ সমাজৰ সাক্ষীত আছিলোঁ

মই তেওঁৰ বৰ্তমান ।

কবিতা :: প্ৰতিশ্ৰুতি --- জাহাঙ্গীৰ আলম

হাতৰ ওপৰত হাত ৰাখি তুমি
মোক দিছিলা প্ৰতিশ্ৰুতি
কাহানিও ন’হও বিচ্ছেদ দুয়ো
বাছি থাকো যদি ।

প্ৰতিশ্ৰুতিৰ সময়ত তুমি বুকু উজাৰি
ব্যাক্ত কৰিছিলা প্ৰেমৰ অনুভূতি
তুমি বিনে নাই কেও মোৰ
এই বিশাল পৃথিৱীত ।

আছেনে মনত তোমাৰ ? তুমি দিয়া কথাটি
দুয়ো হ'ম চিৰ সুখী এই বিশাল পৃথিৱীত
জীৱনৰ বাটত কোনো বাধাক প্ৰশ্ৰয় নিধি
আগুৱাই যাম দুয়ো হাতত হাত ধৰি ।

জীৱনৰ আধা বাটতেই আজি তুমি
পাহৰি গ'লা নেকি ? সকলো প্ৰতিশ্ৰুতি
জানানে তুমি ? তোমাৰ অবিহনে
অকলশৰীয়া জীৱনটো কটাম মই কি দৰে ।

কবিতা :: আপুনি যে এজন ব্যতিক্ৰমী পুৰুষ --- সেৱিকা হাজৰিকা

কোনে কৈছে
আপুনি এজন ব্যতিক্ৰমী পুৰুষ বুলি ?
কোনে কৈছে
আদৰ্শৰ শিকলিৰে মেৰ খাই থকা
আপোনাৰ মন বুলি ?
মোৰ অনুভৱ ,সকলো মিছা
হা হা হা .......
আপুনিও এজন ভদ্ৰতাৰ মুখাৰে নিজক ঢাকি ৰখা লোলুপ পুৰুষ |

নিজৰ গাত আনে বোকা নেদেখাকৈ
বোকাৰ খেল খেলিব বিচৰা
আপুনিও এজন আধুনিক পুৰুষ |

নাৰীৰ দেহৰ ঘ্ৰাণৰ সুগন্ধি লোৱা ,
আদিম বাসনাত ধুব যোৱা ,
আপুনিও এজন তথাকথিত সমাজৰক্ষক |

নাৰীৰ দেহৰ খলাবমাবোৰ
নিতৌ জুখিছে দুহাতে
কিন্তু উমান জানো পাইছে ?
সেই খলাবমাবোৰৰ ভিতৰত যে
এখন মৰম তৃষ্ণাতুৰ হৃদয় আছে ?

কবিতা :: প্ৰতিবিম্ব --- নবীন বৰদলৈ

যেতিয়া চাইবেৰিয়াৰ চৰাইজনীয়ে
হুকহুকাই কান্দে ,
যেতিয়া ইজৰাইলৰ
এজাক নিষ্পাপ শিশুয়ে কান্দে ,
যেতিয়া ব্ৰাজিলৰ অন্ধগলিৰ
প্ৰতিগৰাকী বেশ্যাই ,
কান্দো বুলি কান্দিব নোৱাৰে
তেতিয়া বাৰু তোমাৰ
চকুপানী ওলায়নে ??
নিশ্চয় নোলায় !
ওলাবই বা কিয় ,
কাৰণ
তুমি হ'লা এইখন যান্ত্ৰিক পৃথিৱীৰ
যন্ত্ৰবোৰৰ একো একোটা বুটাম ।‌
কেতিয়াবা এনে লাগে
তুমি যেন
বুটাম টিপিলেহে - কান্দিবা ।‌

কবিতা :: ভালপোৱাৰ প্ৰত্যাহ্বান --- সমুজ্জ্বল ডেকা

পৰিস্কাৰকৈ ধুই দিবা বুলিয়েই
হিয়াখন মই তোমাক দিব বিচাৰিলোঁ
তুমি দুহাত মেলি নিজৰ বুলি ল'লা ঠিকেই
কিন্তু জানিব পাৰিলোঁ তোমাৰ হিয়াখনেই
আন কাৰোবাৰ ওচৰত বন্ধকত থোৱা আছে
হয়তো তোমাৰ প্ৰেমৰ দোকানখনত ভালপোৱাৰ ব্যৱসায়
মুদ্ৰাৰ বিনিময়ত খুব ভালেই চলে ৷
হ'ব তুমি আৰু স্পষ্টীকৰণ দিব নালাগে
তোমাৰ মিছা ভাবনাবোৰে পুৰণি যান-বাহনৰ ধোঁৱাৰ দৰে
বিষাক্ত গেছবোৰ নিগৰাই মাথো ক'লাৰে বুকু পোৰে ৷

কবিতা :: দুখ আৰু দোষ --- নয়নজ্যোতি দাস

মোৰ দোষ:::
তুমি বিচৰাৰ দৰে মই হ'ব নোৱাৰিলোঁ,
তুমি বেয়া পোৱাবোৰক মই ভালপাবলৈ শিকিলো ।

মোৰ দুখ:::
মই বিচৰাৰ দৰে তুমি হ'ব নোৱাৰিলা,
মই ভালপোৱা বোৰক তুমি ভালপাবলৈ নিশিকিলা ।

এতিয়া....
নিজৰ দুখ আৰু দোষক লৈ সুখী হ’বলৈ শিকিছোঁ ।

বৰ্তমান জনপ্ৰিয় লিখনি

শিতান: কবিতা
মুঠ পঢ়ুৱৈ সংখ্যা:134
শিতান: কবিতা
মুঠ পঢ়ুৱৈ সংখ্যা:1,721
শিতান: কবিতা
মুঠ পঢ়ুৱৈ সংখ্যা:82
শিতান: কবিতা
মুঠ পঢ়ুৱৈ সংখ্যা:209
শিতান: কবিতা
মুঠ পঢ়ুৱৈ সংখ্যা:1,531