কবিতা :: চিনাকিও হ’ব পাৰে অচিনাকী --- ৰিমকি ভাগৱতী

শৈশৱতে আইয়ে কৈছিলে

বান্দৰ আৰু ঘৰিয়ালৰ সাধুকথা ,

আৰু বহুবাৰ বুজাইছিল অচিন জনৰ

পৰা নিজকে আতৰাই ৰখাৰ কৌশলৰ কথা ....

যৌৱনৰ দুৱাৰ দলিত ভৰি থোৱাৰ পৰত,

গমকে নাপালো ,

কেতিয়া যে গজি উঠিল ,

হেপাঁহ খেদি ফুৰা দুখনি ডেউকা .......

আৱেগে পাৰ কৰিবলৈ শকতি দিছিলহি

সাগৰৰো পৰিসীমা......

আই তথাপিতো কোনোদিনে পাৰ কৰা নাছিলো ,

তহঁতে আঁকি দিয়া লক্ষণৰেখা ,

বুকুভৰি যে আছিল তহঁতলৈ

নিজতকৈও অধিক ভালপোৱা ।

এদিনাখন তহঁতৰ হেপাঁহেৰে বুলাই দুহাত ,

খোজ দিলো তহঁতেই আগুৱাই দিয়া

সেই চিনাকি চিনাকি বাট.......

আই তইতো কোনোদিনেই কোৱা নাছিলি,

চিনাকি সকলেওঁ কঢ়িয়াই ফুৰিব পাৰে

আঁৰে -আঁৰে এক অচিনাকী মুখ.....

তই যে নিশিকালি আই ?

কেনেকৈ চিনি উলিয়াব লাগে

মুখাৰ আঁৰৰ মুখ ।

আই মোৰ, এতিয়াতো

বহুতো পলম হ’ল.....

হৃদয়ৰ গৰাকীয়েই যেতিয়া

হৃদয়ৰ মঙহেঁৰে পাতিলে বৰ ভোজ,

বিশ্বাসে বাছি লবলৈ বাধ্য হ’ল আত্মহননৰ পথ...

আত্মীয়ই আৱেগৰ চলনাৰে ,

নাবান্ধা হ’লে দুভৰি,

শতৰুৰ ইমান সাহস ক’ত,

ৰুধিবলৈ মোৰ জীৱনৰ বাট ।

আই মোৰ, পিতাইক কবি তই,

ইমানৰ পাছতো ,

মই এৰা নাই , তহঁতে শিকোৱা

অমৃত সন্ধানী পথ.....

ফিনিক্স পক্ষীৰ দৰেই মই,

পাখি হেৰুৱাইও,

হেৰুৱা নাই সুৰুজক চুই চোৱাৰ সপোন ।।

বৰ্তমান জনপ্ৰিয় লিখনি

শিতান: কবিতা
মুঠ পঢ়ুৱৈ সংখ্যা:1,523
শিতান: কবিতা
মুঠ পঢ়ুৱৈ সংখ্যা:1,605
শিতান: প্ৰবন্ধ
মুঠ পঢ়ুৱৈ সংখ্যা:2,202
শিতান: কবিতা
মুঠ পঢ়ুৱৈ সংখ্যা:1,679
শিতান: কবিতা
মুঠ পঢ়ুৱৈ সংখ্যা:2,707
শিতান: কবিতা
মুঠ পঢ়ুৱৈ সংখ্যা:1,788