assamese poems about true love

কবিতা :: হৃদয়ত ফুলি থকা এপাহি ফুল --- ৰাজিদুল ইছলাম

জন্মৰ পৰাই চিনাকি তুমি

মোৰ হৃদয়ত ফুলি থকা

এপাহি ফুল ৷

তোমাৰ সুগোন্ধত

বিয়পি পৰিছিল গাত

প্রেমৰ কেঁচা কেঁচা সুভাস

কিন্তু,নিৰুপায় মই

তোমাকতো চুব পৰা নাই

চাৰিও ফালে কাঁইটে

আগুৰি আছে তোমাক ৷

তাৰ মাজতে

তোমাৰ মধুৰ সৌৰভে

মৌ-মাখি মাতাল হৈ ফুৰিছে

চাৰিওপিনে ৷

হয়তো তুমি মোৰ বাবে নকৰিবা

বেছিদিন অপেক্ষা ৷

আন কাৰোবাৰ স’তে

প্রেমত পৰিবা ৷

সেই দিনাই হ'ব তোমাৰ বাবে

পোহৰৰ বাট

মোৰ বাবে আহিব

আন্ধাৰৰ ঠিকনা ৷

কবিতা :: ৰুমালখন --- সীমান্ত বৰদলৈ

কোনোবা এটা উৰুঙা বসন্তত
ৰুমালখন এৰি আহিছিলা
শূণ্য চকীখনত।
ৰুমালখন উৱলি গ’ল
ৰুমালখন হেৰাই গ’ল ।

ৰুমালত লাগি থকা পাৰফিউমৰ গোন্ধটোৱে
মোক প্ৰায়েই লৈ গৈছিল সেই বাগিচাখনলৈ
যাৰ ফুলবোৰে মোক কোনোদিনে উপলুঙা কৰা নাছিল।
বাগিচাখনলৈ গ’লেই ফুলবোৰ জীপাল হৈ উঠে
ফুলবোৰ যেন একো একোখন ৰঙীন ৰুমাল ।

ৰুমালখনৰ অবিহনে পাৰ হৈ গ’ল কেইবাটাও বসন্ত
ৰুমালখন উৱলি গ’ল
ৰুমালখন হেৰাই গ’ল
ৰুমালখনৰ গোন্ধটো নাকত লগা যেন পাঁও
উভতি যাঁও বাগিচাখনলৈ হেৰুৱা বসন্তবোৰক বিচাৰি ।

Romantic Assamese Poems - তুমি নদী হ'ব নোৱাৰা , নোৱাৰোঁ মই সাগৰ হ'ব --- ৰঞ্জন ভূঞা

মই আছোঁ বাবেই
তোমাৰ ওঁঠত জিলিকি থাকে নেকি হাঁহি
তুমি অভিমানী হোৱা নেকি
সপোন দেখা নেকি
বাৰে বাৰে আঁতৰি গৈ য়ো
কিয় তোমাৰ শেষ ঠিকনা মোৰ কঙাল হৃদয় ৷
তুমিতো জানাই মন গ'লেই
অদৃশ্য হ'ব পাৰিম
আঁতৰি যাব পাৰিম
তোমাৰ হুমুনিয়াহে ঢুকিনোপোৱা দূৰলৈ ৷

তুমি নদী হ'ব নোৱাৰা
নোৱাৰোঁ মই সাগৰ হ'ব
শুকান পথাৰত মোৰ জন্ম তাতেই মৃত্যু
কিয় ইমান প্ৰেম
কিয় ইমান বিশ্বাস তথাপিও ৷

Assamese poems about true love - জীৱন (ধেমালি ধেমালিতে ) --- সুভাষ বৰা

মোৰ বুকুত ঢলি পৰিল তাই

তাইৰ নিশাহবোৰে

বুকুত মোৰ

গুমৰি থাকিলেহি ..........

নৈশব্দৰ গান হৈ

মোৰ আঙুলিবোৰ

আৰু

তাইৰ হাতদুখনো অসাৰ হৈ পৰিল ...............

উদং চণকা পিঠিখন লৈ

ভাৱনাৰ চিৰাল ফটা ৰ'দত

তায়ো উচপিচাই থাকিলে

......শুদা গা দুটাই

ৰাতিৰ এন্ধাৰত

অ'তদিনে সাঁচি ৰখা

আৰু

নোকোৱা বহু ভাৱনাক

সপোন বুলি মানি ল'লে ,

কাজলী কাজলী পুৱাত ।

তাই মোৰ বুকুতে

ঢলি পৰি থাকিল

ওৰে নিশা ,

হাঁহি হাঁহি পুনৰ

সাৰ পালে

এটি উমাল দুপৰীয়াই |

বৰ্তমান জনপ্ৰিয় লিখনি

শিতান: কবিতা
মুঠ পঢ়ুৱৈ সংখ্যা:2,496
শিতান: কবিতা
মুঠ পঢ়ুৱৈ সংখ্যা:946
শিতান: কবিতা
মুঠ পঢ়ুৱৈ সংখ্যা:2,326
শিতান: কবিতা
মুঠ পঢ়ুৱৈ সংখ্যা:2,272
শিতান: কবিতা
মুঠ পঢ়ুৱৈ সংখ্যা:4,087
শিতান: কবিতা
মুঠ পঢ়ুৱৈ সংখ্যা:787