আহিছে মানুহ গৈছে মানুহ
কোনে ৰাখিছে হিচাব ,
মানুহ নাথাকিলেই ক্ষতি কি
থাকিলেই কি লাভ ।
মই নাথাকিলেও দিন ৰাতি হ’ব
জোন বেলি তৰা ওলাব,
বৰষুণ দিব গছে পাত সলাব
চৰায়ে গীত গাব ।
মই আহিছো খাবলৈ পিন্ধিবলৈ
টোপনি মাৰিবলৈ,
এনেকৈ পাৰ হৈ আছে মোৰ
জীৱন নৈ ।
ক'ৰ পৰা আহিছো যাম ক’লৈ
একো নেজানো মই,
কোন সাগৰত গৈ বিলীন হ’ব
জীৱন নামৰ নৈ ।
বান্ধিলো ঘৰ সজালো সংসাৰ
আৰু ক’তো কি ,
সময় হ’লেই এৰিব লাগিব
এই মায়াপুৰী ।
কিবা মই নগদ কিনিলো ।
কিবা আছে বাকী,
হিচাব কৰি মিলাব পৰা নাই
জীৱন মানে কি ?
